сырлы хаттар

Қыздардың сырлы хаттары дегенде сезімін білдіріп, лирикалық мәндегі хаттарды елестетеміз. Бірақ сезімнің орны бір бөлек те, көкірегі ояу, көзі ашық, болашығына үлкен үмітпен қараған 2-3 курс кезіндегі лекция кезінде бір-бірімізге жазған хаттарымызды жариялауды жөн көрдім. Арада біраз уақыт өтсе де бізді сол кезде толғандырған мәселелер бүгінгі күннің студенттерін де ойландырады. Өйткені біз қозғаған тақырыптар сән әлемі секілді бүгін сәнді, ертен мәнсіз, қажетсіз қалатын дүние емес екендігіне осы күні сол хат-күнделіктерімізді оқып, қазіргі жастарға бағыт болар деген ой түйдім. Хат алысып, әңгімелескендер: Алма Сайлауқызы мен –өзім, яғни Алма Ниетбайқызы.
Мақтанатындай жағдай жетеді, 2005 жылғы әл-Фараби атындағы Қазақ Ұлттық университетінің журналистика факультетінің түлектері бүгінде теледидар, радио, газет-журналдарда, баспада өздеріне тиесілі орындарын тапқан журналисттер. Ойы жетік, айтары бар жандар. Есімде қалғаны лекциядан шыққан бойда курстас жігіттеріміз факультеттің ұзын дәлізіне келіп, орта құрып, біреуі гитара ойнап отырса, екіншісі дәп сол жерде өлең шығарып отыратын, ал енді бірі алысқа ұзамай-ақ өзіміздің ұстаздарымызға пародия салатын. Сол пародист-актеріміз халыққа танылған «Терісқақпай» әзіл-сықақ театырының актері Олжас Сыдықбек. Курстың қыздарына сезімдерін білдіріп әзіл-шыны аралас өлеңдер шығарып жіберетін жігіттеріміз бір төбе. Сондай ақындарымыздың ішінде Әбдіхалық Өміржан, Мақсат Мәліковтер бар. Факультеттен тыс жұмыстарын бітіріп жүретіндердің ішінде Хабар арнасындағы «Таразы» бағдарламасының жүргізушісі Ринат Думанұлы да бар. Ал жатақханадағы өмір бөлек әңгіме.

Діттеген мақсатқа жету үшін 4 шарт қажет: ниет, күш, тәртіп, төзім.
***
Іште қайнап, сыртқа шығып, орындалғысы келіп жатқан көп мақсаттар! Уақыт жетпейді-ау! Не істеу керек?..

Адамды кім , не тәрбиелейді осы? Қажетсіз қасиеттерді тастап, керекті қасиетті бойға сіңіруге не әсер етеді? Қалай ойлайсың?
Ай Алма (мен): Алғашқы фундамент үйден қаланады, бірақ негізгі бағыт-бағдарды қоршаған ортаңнан аласың. «Сенің досың кім екенін айтсаң, сенің кім екеніңді айтамын демекші. Бірақ, бізде антивирустық программа жақсы дамыған.
Нұр Алма (Алма Сайлауқызы): Пікіріңе рахмет! Ал енді өзімнің ойымды білдірсем: отбасынан алған негіз әрине, әрдайым тірек болады; дегенмен, менің ойымша, адамды сол орта ішінде өткізген уақыт тәрбиелейді. Уақыт өте, адам біраз нәрсені түсіне бастайды, ішкі түйсігіне сүйеніп, дұрыс бағамдауға тырысады. Мүмкіндігінше, ізгілікке ұмтылып, қарабайырлық пен дөрекіліктен жиіркенебастайды. Осылайша, өздігінен өзі, тіпті байқамастан, «редакцияланады» .